Alda Nielsdóttir
Donald Tusk, fyrrverandi pólskur forsætisráðharri og ES-forseti til 2019, heitir á fólkið í Póllandi um at boykotta forsetavalið, sum eftir ætlan skal vera um tvær vikur.
Pólska stjórnin ynskir ikki at útseta valið hóast koronasmittan herjar. Í staðin leggur hon upp til, at valið skal avgreiðast umvegis brævatkvøðu. Hesum tekur Donald Tusk ikki undir við.
– Tað, sum stjórnin hevur fyrireikað til 10. mai hevur einki við eitt val at gera, sigur hann og leggur afturat, at hann sjálvur ikki ætlar at fara á val, tí han heldur tað vera ótrygt og í stríð við stjórnarskipanina hjá landinum. Hann heldur, sambært Ritzau, at onnur áttu at gjørt tað sama.
Andstøðan í Póllandi krevur, at valið verður útsett, eitt nú hevur pólski heilsumálaráðharrin skotið upp, at mann útsetur valið til 2022. Hetta hevur stjórnin tó noktað at gjørt.
Les eisini: Pólski heilsumálaráðharrin vil útseta forsetaval til 2022
Avgerðin hjá stjórnini um at avgreiða valið umvegis brævatkvøðu skal fyrst samtykkjast í pólska tjóðartinginum, og viðgerðin verður eftir ætlan 6. mai – fáar dagar áðrenn valið.
Vinarliga broyt tínar kennifíla - og privatlívsstillingar fyri at síggja hetta innihald